ప్రణవము
‘ఓం’కారమును ప్రణవము అంటారన్నది సనాతన ధర్మచారులకు తెలియనిది కాదు. ఎందుకు అంటారు అన్నది కొందరికి తెలియక పోవచ్చు. నాకు తెలిసిన మేరకు,మీ ముందుంచవలెనన్నది నా ఉబలాటము, పాఠకులు చదువుతారా చదువరా అన్న సందిగ్ధమును విడిచిపెట్టి. ప్రణవము తనకు తానే గురువు. శుచిగా నిత్యమూ జపించుకొనుటకు వర్ణ విచక్షణ లేకుండా అందరికీ అత్యంత సులభమైన మంత్రము.
ప్రకృతి నుండి ఉత్పన్నమగు సంసారరూపమహాసాగారము యొక్క
సంకేతము ‘ప్ర’. ఈసాగరము దాటించే ‘నావ’( ణవ లేక నవ యొక్క రూపాంతరము) ప్రణవము.ప్రనవముగా
పిలువబడు ‘ఓంకారము’ తన సాధకులతో ఈ విధముగా చెబుతుందట:
ప్ర= ప్రపంచము; ‘న’= కాదు; వః= మీకొరకు
అంటే ‘ప్రణవము’ అన్న ఈ చిన్న పదము జగన్మిధ్య అన్న
వాస్తవాన్ని తెలియబరచుతూ పరబ్రహ్మలో లీనమగుటయే నీకు అందవలసిన, చెందవలసిన,
పొందవలసిన సాధనాఫలము అని తెలియజేస్తున్నది. ఏ, ప్రపంచములోని, ఇతర పురాతన భాషలని చెప్పుకొనబడుచున్న
భాషకూ లేని ఔన్నత్యము ఒక్క సంస్కృతమునకే దక్కినది. అణువంత పదములో ‘ఆకాశమంత’
అర్థాన్ని అందించగలుగుతుంది. కావున ‘ప్రణవము యొక్క ఈ స్వరూప స్వభామును గ్రహించిన
వాడు ‘జ్ఞాని’.
ఇదే ప్రణవమునకు, మరియొక అర్థమును గ్రహించండి. ప్ర:
= ప్రకర్షేణ (అతిశయించిన మేలు); నః= నయేత్ (కలిగించును); వః = యుష్మాన్ (వః అన్నా
యుష్మాన్ అన్నా మీకు అని అర్థము) మోక్షమ్ ఇతి ప్రణవః. అంటే ఈ ఓంకారము సాధకులకు
బలవవంతముగా మోక్ష ప్రాప్తిని చేకూర్చుతుందట. తనను జపించు యోగుల, తనననుష్ఠించు అచంచల సాధకుల,
ఉపాసించు ఉత్తముల సకల కర్మలనూ నశింపజేసి,వారికి నూతన దివ్య విజ్ఞానమును ప్రసాదించేదే
ప్రణవము.
మన అనుభవములో ఉన్నది మాయామేయమగు జగత్తు. మరి
పరమేశ్వరుడో మాయారహితుడు. అందుచే ఆయన నవీనుడు. కాబట్టి ‘నవ’ అన్న మాట ఆయనకు
చెల్లుతుంది. ఆయన ప్రకృష్టమగు మేలుచేయు నవీనుడు ఆయన. కావున అసలు ‘ప్రణవమే’
పరమాత్మూడు. ఇందులో చూలి, శూలి, వనమాలి అంటే బ్రహ్మ, శివ కేశవ భేదము లేదు.
ఆవిధముగా ప్రణవమును అనుష్ఠించి భక్తుడు భగవంతునిలో లీనమౌతాడు అంటే ఇప్పుడు భక్తుడూ
నవీనుడే!
ఒక వ్యక్తికి బాల్య కాలమున సంస్కారమునొసంగ వలసిన
బాధ్యత భారము తల్లిదండ్రులది. ఆ విధముగా మా పూర్వులు చేసినారు కాబట్టి చాలామంది
మాఈడు వాళ్ళకు ఆ సంస్కారము అబ్బినది. నేడు పరిస్థితులు ఉపరిస్థితులకు చేరినాయి, అంటే
పైఅంతస్తుకు (Higher Level) చేరినాయి. అక్కడ అనుబంధము, ఆప్యాయత, ఆత్మీయత మృగ్యము. భార్య భర్తను నమ్మదు, భర్త భార్యను నమ్మడు.
ఇరువురూ పిల్లల విషయములో తగినంత శ్రద్ధ తీసుకోరు. పిల్లలకు తెలియజేయుటకు మంచి
విషయములు తెలుసుకొన శ్రద్ధ చూపరు. వార్తావాహక మాధ్యమాలననుసరించి వారికి వావి
వరుస, పెద్ద చిన్న, మంచి చెడ్డ అన్న తారత్యమే లేకుండా చేస్తారు. సంస్కారహీనులను సంఘమునకు అందించేదానికంటే సంతాన హీనులుగా ఉండిపోవుట మేలు.
కళ్ళు తెరువండి. మంచిని గ్రహించండి చెడును గర్హించండి.
उतिष्ठत जग्रत वरान् प्राप्य तत् निबोधत।
क्षुरस्य धारा निशिता दुरत्यया दुर्गं तत् पथःll इति कवयः वदन्ति (కఠోపనిషత్)
ఉత్తిష్ఠత! జాగ్రత !ప్రాప్యవరాన్ నిబోధత l
క్షురస్య ధారా నిశితా దురత్యయా దుర్గం తత్
పథఃll ఇతి కవయోవదంతి (కఠోపనిషత్)
లేవండి,
మేల్కొని జాగరూకతతో మహనీయులను గమనించండి. మీరు చేపట్టుచున్నది అసిధారా వ్రతము (Walking on the highly sharp edge of a blade),
కావున అది ఎంత ప్రమాదభరితమో గమనించండి.
అని
చెబుతున్నారు మనకు జ్ఞానభిక్ష పెట్టిన మహర్షులు. ఇక్కడ మనము నడిచేదారి
ప్రమాదభారితము అంటే ఈ రోజు మనము పిల్లలను శ్రద్ధతో పెంచకపోతే అది తనకు,
కుటుంబమునకు, సంఘమునకు, రాష్ట్రమునకు, దేశమునకు, ప్రపంచమునకు ప్రళయసాదృశము కాగలదు.
స్వస్తి.
