నా మాట (చి.కుం.సౌ. లక్ష్మి కొరకు ఆమె మాటల్లో)

ఇక్కడ చేరిన పెద్దలకు నమస్కారం సోదరీ సోదరులకు స్వాగతం చిరంజీవులకు ఆశీర్వాదం.

అదో మైకు అంటే ఇదో బ్రేకు అనే మనస్తత్వము నాది. దానికితోడూ వేదికనలంకరించిన వారంతా లబ్ధ ప్రతిష్ఠులు, నాకు మార్గ దర్శకులు మరియు దిశా నిర్దేశకులు. వారి ముందు నేను మాట్లాడుట ఫ్లడ్ లైట్ వెలుతురులో టార్చ్ లైట్ వేసినట్లుంటుంది. కానీ నన్ను మాట్లాడమని ప్రోత్సహించిందే వారు. పెద్దలమాట తలదాల్చి మైకు ముందుకొస్తున్నాను . మైకు మైకం లో తప్పులేవయినా మాట్లాడితే పెద్దలను క్షమింప గోరుకొంటున్నాను.

నేడెంతో సుదినం. కలలు అందరూ కంటారు. ఇదే కలే కంటాను అనేవాళ్ళు కొందరుంటారు. జీవితమంతా దానికై శ్రమించి బహు కొద్దిమంది సాకారం చేసుకొంటారు.

కృతజ్ఞత అన్నది (గ్రాటిట్యూడ్ అంటారు ఇంగ్లీషులో ) ఒక గొప్పగుణము. 7th claas కు వస్తే 6th సిలబస్ మరచి పో అనే ఈ కాలములో ఎంత ఎదిగినా తన మూలాలు మరువని, కృతజ్ఞత విడువని మావారు నాకాదర్శము.

అన్నదమ్ములగు కోటిరెడ్డి, సుబ్బారెడ్డి గార్లలో లో తమ్ముడైన తనభర్త  నిజంగానే ఒక రామునికి లక్ష్మణుడై , నందిగల సంసారమనే తోటకు కంచెయై , పంటచేనును కాపాడే మంచెయై , అందమైన చిత్రానికి కుంచె యై,మంచికి మారుపేరయిన తన భర్త స్వర్గస్థుడైతే తన బావగారిని తోడికోడలును తల్లిదండ్రులకంటే తక్కువగా భావించక తానూ పడిన కష్టములోనే సుఖము చూసుకొన్న దేవత మా 'అమ్మమ్మ' శేషమ్మ . (ఆమ్మమ్మ అని పిలువడము నా అలవాటు ) మా వారైతే ఏకంగా ఆవిడను అమ్మ అని తప్పించి నాన్నమ్మా అని కూడా పిలువరు. పెద్దగా చదువుకోకున్నా కష్టపడే కాయము ఇంటి యొక్క శ్రేయము ఆమె ధ్యేయముగా పదునైన తెలివితేటలతో బావ గారి పిల్లలను, వారి పిల్లలను, తన పిల్లలను అందరినీ అక్కున చేర్చుకొని ఆడపిల్లల పెళ్ళిళ్ళు, అబ్బాయిల చదువులు అన్నీ 'ఒక సూర్యుండు సమస్త జీవులకు తానొక్కొక్కడై తోచు' 

విధముగా సక్రమముగా చేసిన స్వయంసిద్ధ ఆమె. స్వయంసిద్ధ అంటే గురువు అవసరము లేకనే తాను జీవితమునుండి పాఠాలు నేర్చుకొని రాణించిన నేర్పరి. మా వారి తండ్రి గారు అంటే మా మామగారిని వ్యవసాయములో వుంచి, తన పర అన్న తారతమ్యము లేకుండా, భూములను కాపాడజేసింది. తన కుమారుడైన , మా వెంకటరెడ్డి మామగారిని డాక్టరును జేసి, పెద్ద పారిశ్రామిక వేత్తగా చేసి  తన తరువాత మాకు నీడనిచ్చే చెట్టుగా తీర్చి దిద్దింది. మా వారిని సాకి ఆ కాలానికే PG చేయించి ఒక పెద్ద పారిశ్రామిక వేత్తగా తయారు చేసింది . పెద్దలు పెట్టిన 'శేషమ్మ' అన్న పేరు ఆమె సార్థకము చేసుకొంది.అదెట్లంటే 'మొత్తము ఈ భూమినే మోసేది శేషుడని' కదా చదివినాము. ఈవిడ కూడా మా వంశానికి శేషుడై శత్రువులు దరికి రాకుండా కాపాడింది. ఆ తల్లికి జోహారు.

ఇక నాలుగు మాటలు మా అత్త గారయిన అక్కమ్మ గారిని గురించి. ఒక్క మాటలో చెప్పాలంటే 'ఇంటికి దీపం ఇల్లాలే ' అన్న మాటను అక్షరసత్యం చేసిన వ్యక్తి ఆవిడ. మావారితో నాకు పెళ్ళయినది మొదలు ఆవిడ బ్రతికినంతకాలము  అక్క గానూ అమ్మగానూ నన్ను చూసుకొందేగానీ అత్తగా ఎన్నడూ చూసిన పాపాన పోయినదిలేదు. అందుకే ఆమెకు అక్కమ్మ అన్న పేరు పెట్టినారేమో ! ఆమె ఆరోగ్యముకోరకు మావారు ఎంత ఖర్చు చేసినా ఇంకా ఏమైనా చేయమనేదానిని. ఆమె నీడలో ఇంకా వుండే అదృష్టము నాకు లేకపోయింది.

అటువంటి నిస్వార్థ జీవుల పెరుతో ఒక TRUST ను ఏర్పాటు చేసి తెలివయిన పేద పిల్లలకు సహాయము చేయ నడుము బిగించిన మా శ్రీవారు అత్యంత ప్రశంసనీయులు. భగవంతుడు ఈ ట్రస్టును దిన దిన ప్రవర్ధమానమై సంఘమునకు ప్రయోజనకరమై, చురుకైన పేదవిద్యార్థుల పాలిటి వరమై, చిరమై వర్ధిల్ల జేస్తాడు.  ఎందుకంటే మంచికి దేవుని అండ ఎప్పుడూ వుంటుంది కదా !

ఇక మా పాఠశాల - విద్య ను గూర్చి నాలుగు మాటలు మాట్లాడుతాను.

అదిగోనండీ అదియే మాబడి 

చదువుల తల్లికి నిర్మించిన గుడి 

నేర్పును మాకది చక్కని నడవడి 

కాదది బడి మా తల్లి యొడి 

అమ్మా నాన్నల పెట్టక ఆరడి 
చేయక ఎప్పుడు మాటల గారడి
బడికి పోయెదము రోజూ వడివడి
నిలువమెప్పుడూ అడుగులు తడబడి

గురు వచనములకు కట్టుబడి
పాఠము విందుము చేయక సవ్వడి
పోకుండా మేమెప్పటికీ చెడి
కాచేవారలు సురలు సుడీ

ఇది మాకత్యంత ఆప్తులు గౌరవనీయులు అయిన చెరుకు రామమోహన్ రావు గారు బడిని గురించి వ్రాసిన గేయము ఇది. విద్యార్థుల లేత హృదయాలలో ఈ భావన కలిగించుటే మా పాఠశాల ఆశయము. విద్య శిక్షలు విద్యార్థి భవిష్యత్తు అనే బండికి రెండు చక్రాలు. శిక్ష లేని విద్య తావిలేని పూవే.విద్య లేని శిక్ష చంద్రుడు లేని రాత్రే . ఈ రెంటినీ సమన్వయ పరచి విద్యార్థుల భవిష్యత్తుకు బంగారుబాట వేయుటే మా లక్ష్యము. 

ఇంతకు మించి చెప్పడము నా శక్తికి మించిన పని అవుతుంది. అందుకని నాకు ఈ అవకాశామునిచ్చిన పెద్దలకు నమస్కరించి విరమించుకొను చున్నాను.